Þegar líður að þinglokum er gott að líta aðeins í baksýnispegilinn og horfa á það sem afrekast hefur í vetur. Fjölmörg framfaramál hafa orðið að veruleika fyrir tilstuðlan þeirrar ríkisstjórnar sem Samfylkingin veitir forystu og stjórnarmeirihlutans á Alþingi.
- Fyrir það fyrsta erum við að klára afgreiðslu nýrrar samgönguáætlunar og stofnun sjálfstæðs innviðafélags, sem á eftir að auka getu okkar til að fara í stórframkvæmdir í vegakerfinu. Viðhald vegakerfisins verður stóraukið næstu árin – og við erum að fara að byrja aftur að bora jarðgöng, eftir allt of langt framkvæmdastopp.
- Í heilbrigðiskerfinu er verið að gera tímamótasamninga við mikilvæg samtök eins og SÁÁ og Ljósið, Krýsuvík og Hlaðgerðarkot. Alls er heildarfjármagn til áfengis- og vímuefnameðferðar komið upp í 3,2 milljarða kr. á ári – sem er aukning um 850 milljónir.
- Stórátak í uppbyggingu hjúkrunarrýma er byrjað að skila árangri. Sett hefur verið í forgang að opna rými sem létta álagi af bráðamótttöku Landspítala og staðan þar er orðin mælanlega betri eftir opnun 100 nýrra skammtímarýma í Urðarhvarfi – og yfir 70 rými til viðbótar verða klár á næstu mánuðum.
- Biðlistar eftir sálfræðingum, bæði fyrir börn og fullorðna, hafa styst. Biðtími fullorðinna eftir sálfræðingi á heilsugæslu hefur styst úr 288 dögum í janúar 2025 í 114 daga í janúar 2026. Bið barna hefur líka styst, úr 184 dögum í janúar 2025 niður í 114 í janúar 2026.
- Við erum búin að bæta námslánakerfið, með breytingum á lögum um Menntasjóð námsmanna sem fela meðal annars í sér hækkun frítekjumarks, að fleiri námsmenn fái hluta námslána sinna sem styrki og lengri endurgreiðslutíma hárra lána, til að létta greiðslubyrði fólks.
- Við héldum líka áfram að bæta fæðingarorlofið. Í vetur var tryggt að hækkun fæðingarorlofsgreiðslna muni ávallt ná til þeirra sem eru að taka orlof, óháð því hvenær barnið þeirra fæddist. Fleiri skref að betra fæðingarorlofi verða tekin á kjörtímabilinu.
- Frumvarp um tengingu almannatrygginga við launavísitölu var samþykkt í mars, til að stöðva þá kjaragliðnun sem hefur átt sér stað á milli vinnumarkaðarins og þeirra sem geta ekki unnið vegna fötlunar, heilsubrests eða aldurs. Frítekjumark eldra fólks hefur líka verið hækkað, úr 36.500 kr. upp í 60.000 kr. á mánuði.
- Risastórt mannréttindaskref var svo tekið með lögfestingu Samnings Sameinuðu þjóðanna um réttindi fatlaðs fólks í nóvembermánuði.
- Við erum að taka til í húsnæðismálum. Búið er að styrkja hlutdeildarlánakerfið og gera breytingar til að það ýti undir húsnæðisframboð. Ný húsaleigulög sem samþykkt voru í október styrkja rétt leigjenda og auka gagnsæi á leigumarkaði, en nú þarf að skrá alla leigusamninga hjá HMS.
- AirBnB-frumvarpið sem var samþykkt í mars takmarkaði skammtímaleigu íbúða við lögheimili fólks og eina aðra fasteign utan þéttbýlis – enda eiga íbúðir að vera heimili, ekki fjárfestingavara.
- Fleiri aðgerðir til að bæta stöðu mála á húsnæðismarkaði eru á döfinni, enda hefur ríkisstjórnin kynnt húsnæðispakka með margþættum aðgerðum sem munu ýta undir uppbyggingu fyrir alla tekjuhópa – meðal annars á ríkislóðum í Reykjavíkurborg.
- Það er verið að einfalda stjórnkerfið. Við erum búin að sameina Skipulagsstofnun og Húsnæðis- og mannvirkjastofnun, sameina öll sýslumannsembætti landsins og núna á lokametrum þingsins erum við að sameina Matvælastofnun, Fiskistofu og Verðlagsstofu skiptaverðs í eina stofnun, Stofnun atvinnuveganna – auk þess sem verið er að einfalda umgjörð heilbrigðiseftirlits í landinu.
- Á sviði orkumála hefur verið unnið ötullega að því að höggva á hnúta, koma framkvæmdum af stað og styrkja innviði, ekki síst á Norðausturlandi og Vestfjörðum. Við erum líka að jafna flutningskostnað raforku – sem skiptir fólk í dreifbýli og á köldum svæðum stórmáli.
- Ráðist hefur verið í fjárfestingarstuðning við garðyrkjubændur, til að spara bæði orku og peninga. Árangurinn jafnast á við raforkunotkun 3.900 venjulegra heimila.
- Það er líka búið að afnema vörugjöld af rafbílum – svo fólk hafi skýran hvata til að nýta íslenska orku á bílinn. Áfram erum við svo að byggja upp hleðslustöðvar hringinn í kringum landið – lokum hleðslugatinu.
- Við erum líka að setja miklu skýrari ramma um nýtingu vindorku. Þar viljum við fara varlega, vernda viðkvæm svæði og beina uppbyggingu vindorkuvera að þegar röskuðum svæðum. Samþykkt hefur verið að ráðherra orkumála leggi á fjögurra ára fresti fram tillögu til Alþingis um orkuöflunarstefnu til næstu 25 ára – því við þurfum að vita hvert við ætlum að stefna.
- Kílómetragjöld hafa verið innleidd, í stað skattanna sem fólk greiddi áður við dæluna. Þau tryggja sanngjarna og sjálfbæra gjaldtöku fyrir notkun á vegakerfinu og koma í veg fyrir að tekjustofnar ríkisins af umferð um vegina okkar allra haldi áfram að dvína.
- Við erum að taka til í ríkisfjármálunun – og höfum þegar minnkað skuldir ríkissjóðs um 7,5% af vergri landsframleiðslu. Fjármálaáætlun gerir ráð fyrir hallalausum fjárlögum 2027 og að ríkið verði rekið með afgangi öll ár fjármálaáætlunar. Með þessu styður ríkið við minni verðbólgu og lægri vexti í framhaldinu.
- Síðast en ekki síst hefur stjórnin komið því til leiðar að farið verði í þjóðaratkvæðagreiðslu um að hefja á ný aðildarviðræður við Evrópusambandið. Þetta risastóra lýðræðismál er nú komið í hendur þjóðarinnar.
Hér er að sjálfsögðu ekki um tæmandi upptalningu að ræða, enda væri það hreinlega erfitt. Svo mörg eru framfaramálin.
Við jafnaðarfólk getum verið stolt af verkunum hingað til – og við höldum áfram!