Þvert á það sem margir eflaust halda er meirihluti íbúa á höfuðborgarsvæðinu ánægður með ferðir sínar til vinnu eða í skóla á höfuðborgarsvæðinu, með tilliti til skipulags- og samgöngumála, umferðar og tímalengdar. Þessar niðurstöður koma fram í nýlegri könnun sem Gallup framkvæmdi fyrir bílaumboðið Toyota á Íslandi á meðal íbúa á höfuðborgarsvæðinu.
Margir klóra sér eflaust í höfðinu yfir þessu, enda er umræðan í samfélaginu og fjölmiðlunum okkar gjarnan á þann veg að mikil óánægja sé með stöðu þessara mála. Það virðist hins vegar fjarri upplifun meirihluta fólks af daglegum veruleika sínum.
Alls segjast nefnilega 54,3 prósent íbúa á svæðinu vera ánægð með ferðir sínar til og frá vinnu, en 28,6 prósent sögðust óánægð.
Mesta ánægjan í Reykjavík
Myndin verður enn skýrari þegar horft er til búsetu. Innan Reykjavíkurborgar er ánægjan með ferðir til vinnu, t.d. skipulags- og samgöngumál, umferð og tímalengdir, enn meiri en almennt á höfuðborgarsvæðinu öllu.
Svarendur í vesturhluta borgarinnar, póstnúmerum 101, 102 og 107 eru ánægðastir, eða 75%. Í miðhluta borgarinnar, póstnúmerum 103, 104, 105 og 108 segjast svo 66% vera ánægð. Í Grafarvogi, póstnúmeri 112, eru 65% ánægð með ferðir sínar til og frá vinnu, en þó færri sem segjast „alfarið“ eða „mjög“ ánægð en innan Elliðaáa.
Ánægjan er hins vegar minni í öðrum hverfum austurborgarinnar, póstnúmerum 109, 110, 111 og 113. Þar segjast þó enn töluvert fleiri vera ánægð með ferðir sínar til og frá vinnu eða skóla en óánægð, eða 49% á móti 29% svarenda.
Um 50% Hafnfirðinga eru ánægðir með ferðir sínar til vinnu, en um 29% óánægð. Í öðrum sveitarfélögum er minni ánægja. Í Kópavogi eru um 42% ánægð og 42% óánægð og í öðrum nágrannasveitarfélögum Reykjavíkur (Garðabæ, Mosfellsbæ og Seltjarnarnesi, sem flokkast saman í niðurstöðum könnunarinnar) eru hlutföllin svipuð og í Kópavogi.
Einungis 41% segjast helst vilja keyra
Þau sem nýta sér virka ferðamáta til vinnu, fara gangandi eða hjólandi, eru langánægðust með ferðirnar. Aðrir eru síður ánægðir og munar þar litlu á þeim sem ferðast með Strætó og þeim stóra hópi sem fer um á einkabíl, en rúmlega 45% fólks í þessum hópum segjast ánægð með sínar ferðir. Um tuttugu og sjö prósent þeirra sem fara með Strætó eru óánægð, en 34% þeirra sem aka bíl eru hins vegar óánægð með sínar ferðir í vinnuna eða skólann.
Þrátt fyrir þessa ríku óánægju er það svo, samkvæmt þessari könnun, að 73% fara oftast akandi í vinnuna og 5% til viðbótar fá far með einkabíl. Tíu prósent segjast oftast labba, sex prósent hjóla og önnur sex prósent taka strætó.
Hins vegar, þegar fólk er spurt um það hvernig það myndi helst vilja ferðast til vinnu eða skóla, segjast einungis rúmlega 41% vilja fara keyrandi á bílnum. 22% myndu helst vilja labba, 16,6% hjóla og 12,7% fara með strætó. Athyglisvert er að það er einmitt hér um bil sama hlutfall og horft er til að nýti sér þjónustu strætó til framtíðar, samkvæmt markmiðasetningu í svæðisskipulagi höfuðborgarsvæðisins fram til 2040.
Þetta segir okkur tvennt. Í fyrsta lagi það að margir myndu kjósa að búa nær vinnustöðum sínum en þeir gera í dag. Í öðru lagi, að mjög mörgum langar að hafa raunverulegt og betra val um ferðamáta.
Það ætti því að vera fagnaðarefni að unnið er að krafti að verkefnum samgöngusáttmála höfuðborgarsvæðisins, sem mun fjölga valkostunum , auk þess að bæta flæði bílaumferðar með brýnum stofnvegaframkvæmdum eins og Sæbrautarstokki, Miklubrautargöngum og bættum gatnamótum Reykjanesbrautar og Bústaðavegar.
Fulla ferð áfram!