Nýtt útspil Samfylkingarinnar, sem kynnt var með pompi og prakt á bílaplani fyrir utan JYSK í Kópavogi nýverð, hefur fengið stjórnarandstöðuflokkana og fjölmiðlana þeirra til að þurfa að anda í bréfpoka af bræði. Ástæðan er sú að þar er ítrekað að það sé stefna Samfylkingarinnar að setja nýja löggjöf um að lögfesta rétt barna til leikskólavistar að loknu fæðingarorlofi og að það eigi að vera sameiginlegt verkefni ríkis og sveitarfélaga.
Þetta hefur reyndar verið stefna flokksins árum saman og til þess gert að brúa bilið í umönnun barna sem er ekki til staðar í neinum af helstu nágrannalöndum okkar sem hafa fyrir löngu farið þessa leið.
Í útspilinu, sem er stefnumarkandi fyrir framboð Samfylkingarinnar í sveitarstjórnum út um allt land, er lagt til að byggt verði á tillögum aðgerðarhóps forsætisráðuneytisins um brúun bilsins sem skipaður var fulltrúum verkalýðshreyfingar, fyrirtækja, kennara, sveitarfélaga og ráðuneyta. Sá aðgerðarhópur skilaði mjög vel unninni skýrslu í desember í fyrra, rúmu ári eftir að hann var skipaður í september 2024 af þáverandi forsætisráðherra, Bjarna Benediktssyni. Í hópnum sat meðal annars Anna Hrefna Ingimundardóttir, frænka Bjarna og aðstoðarframkvæmdastjóri Samtaka atvinnulífsins, auk þess sem Hildur Björnsdóttir, oddviti Sjálfstæðisflokksins í Reykjavík, var formaður hópsins um tíma áður en henni var skipt út fyrir Henný Hinz, hagfræðing sem starfaði árum saman sem aðstoðarmaður ríkisstjórnar Sjálfstæðisflokks, Vinstri grænna og Framsóknar.
Samfylkingin, og þeir flokkar sem runnu inn í hana við stofnun rétt fyrir síðustu aldamót, er það afl sem hefur verið leiðandi í uppbyggingu leikskólakerfisins á Íslandi. Sú uppbygging hófst með því að R-listinn tók við völdum í Reykjavík árið 1994 og hefur haldið sleitulaust áfram síðan þá, þrátt fyrir að það sé ekki lögbundið fyrir sveitarfélög að sinna leikskólaþjónustu. Samfylkingin stendur einfaldlega með börnum og barnafólki og finnur til ábyrgðar á að létta þeim lífið og tilveruna. Sú ábyrgð leiðir iðulega til aðgerða.
450 þúsund króna barnaskattur Sjálfstæðisflokks
Skýrasta dæmið um muninn á því hvað það þýðir fyrir barnafólk að vera með Sjálfstæðisflokk við stjórn sveitarfélags og því að vera með Samfylkinguna sést í nýlegum breytingum á vistunartíma barna í leikskólum. Í Kópavogi, sem rekinn er á frjálshyggjuhugmyndafræði, er hægt að fá fría vistun í 30 tíma á viku en svo þarf að borga, mjög, mjög mikið. Á sama tíma býður Reykjavík upp á 36 tíma fría vistun og hlífir auk þess þeim sem hafa minnst á milli handanna við miklum viðbótarkostnaði ef þau þurfa að vera með börnin sín lengur á leikskóla.
Skýrasta dæmið er að venjuleg fjölskylda með tvö börn á leikskóla sem þarf að vista þau á leikskóla í Kópavogi í 40 tíma á viku borgar 450 þúsund krónum meira en sama fjölskylda myndi þurfa að borga í Reykjavík. Því fer nærri að þar sé um ein mánaðarlaun annars foreldrisins fyrir skatta að ræða.
Slíkur barnaskattur verður aldrei innleiddur á vakt Samfylkingarinnar. Gjaldapólitík Sjálfstæðisflokksins gegn barnafólki er ekki, og verður aldrei, svarið við leikskólavandanum.