Guðmundur Ari Sigurjónsson, þingflokksformaður Samfylkingarinnar, stýrði sínum fyrsta fundi sem formaður þekkingar- og menningarnefndar Norðurlandaráðs á þriðjudag, en hann var kjörinn formaður nefndarinnar í október í fyrra.
Nefndin er ein af fimm fagnefndum Norðurlandaráðs og er skipuð þingmönnum af Norðurlöndunum. Hún fjallar um fjölbreytt mál sem snúa að menntun, menningu, rannsóknum og nýsköpun, fjölmiðlum og íþrótta- og æskulýðsstarfi á Norðurlöndunum.
Þegar Guðmundur Ari var gerður að formanni nefndarinnar höfðu liðið tólf ár síðan íslenskur þingmaður leiddi eina af fagnefndum Norðurlandaráðs, en Siv Friðleifsdóttir, þá þingmaður Framsóknarflokksins, var formaður velferðarnefndar ráðsins 2007 til 2013.
Á fyrsta fundi sem Guðmundur Ari stýrði var ákveðið að fylgja tillögu nefndarinnar um útivist eftir, en hún felur í sér að Norðurlandaráð leggi til við Norrænu ráðherranefndina að koma á fót styrktu og formlegu norrænu samstarfi um útivist þvert á landamæri á Norðurlöndum.
Viðbótartillaga jafnaðarmanna í Norðurlandaráði, um að leggja sérstaka áherslu á börn og ungmenni, var einnig samþykkt í nefndinni og uppfærð tillaga verður lögð fram á þemaþingi Norðurlandaráðs í apríl sem fer fram í Ósló.
Dagbjört: Samstarf Norðurlanda okkur mikilvægt
Dagbjört Hákonardóttir, þingkona Samfylkingarinnar og formaður Íslandsdeildar Norðurlandaráðs, sótti að venju fundinn ásamt Guðmundi Ara. Í færslu á samfélagsmiðlum sagði hún meðal annars frá því að öryggi hafi verið mikið til tals, meðal annars viðbragðsáætlanir landanna sem hægt sé að grípa til ef þess þarf. Var meðal annars rætt um hvað hinn almenni borgari þurfi að vera með á reiðum höndum þegar öryggisógn steðjar að? Í Svíþjoð og Noregi er mælt með að hann sé með birgðir sem endast í sjö daga, á meðan Danmörk og Finnland mæla með þremur dögum. Dagbjört stóð þarna tómhent í samanburðinum, en Ísland hefur hingað til ekki sett sér sambærilega viðbragðsáætlun. Það er nú unnið hörðum höndum að því að búa til slíka, og utanríkisráðherra mun kynna slíka áætlun fyrir Ísland á næstu vikum.
Fulltrúar Alþingis á í Norðurlandaráði.
Dagbjört segir einnig að eindreginn stuðningur við Úkraínu hafi verið rauður þráður fundarins. „Fjórum árum eftir innrás Rússlands er samstaða Norðurlanda skýr og óhagganleg. Við stöndum vörð um fullveldi, alþjóðalög og grundvallargildi lýðræðis. Barátta Úkraínu er barátta okkar allra og naut ég þeirra forréttinda að sitja til borðs með fulltrúa sendiherra þeirra í Danmörku þar sem hann lýsti þrautargöngu þinni á flótta frá Donbas-héraði þaðan sem hann er ættaður.“
Auk þess hafi nýverið verið tekin mikilvæg skref í ráðherranefndinni í átt að endurskoðun Helsingforssamningsins – grundvallarsáttmála norræns samstarfs. Markmiðið með þeim skrefum er, að sögn Dagbjartar, að tryggja að Grænland, Færeyjar og Álandseyjar sitji við sama borð og Norðurlandaríkin fimm og þeim gert jafnhátt undir höfði. „Það er í senn eðlileg þróun og mikilvægt réttlætismál. Norrænt samstarf á að endurspegla raunveruleikann eins og hann er í dag, ekki eins og hann var fyrir hálfri öld þegar samningurinn var samþykktur á sínum tíma.“
Hún bendir á að samstarf Norðurlanda sé okkur mikilvægt öryggisnet þar sem við deilum margumtöluðum gildum og framtíðarsýn. „Nú hefur jafnframt verið boðað til kosninga í Danmörku (og Færeyjum!) og við fylgjumst þétt með gangi mála – ekki síst við jafnaðarmenn.“
Þú getur fylgst með starfi sósíaldemókrata í Norðurlandaráði á Facebook síðu þeirra, Socialdemokraterne i Nordisk Råd.