Í vikunni kynnti meirihlutinn í Reykjavík uppfærðar tillögur um nýtt kerfi í leikskólum borgarinnar. Tillögurnar byggja á víðtæku samráði í kjölfar tillagna sem kynntar voru í haust og hafa það að markmiði að bæta starfsumhverfi í leikskólum. Af þessu tilefni kom Skúli Helgason borgarfulltrúi í viðtal í hlaðvarpi Kratans sem aðgengilegt er á öllum helstu veitum og ræddi um leikskólamálin og nýju aðgerðirnar í borginni: Reykjavíkurleiðina.
„Ég held að það sé rétt mat hjá okkar fólki að þróunin undanfarin ár hefur ekki verið nógu jákvæð,“ sagði Skúli um stöðu málaflokksins og ástæður þess að borgin er búin að ákveða að ráðast í þessar aðgerðir á leikskólunum.
„Mönnunarvandinn hefur verið mikill, eins og hann hefur verið í 15 ár, síðan að kennaranámið var lengt í 5 ár. Svo bætti um betur árið 2021 þegar lögum var breytt og fjarlægð þessi hindrun um að kennarar gætu fært sig á milli leik- og grunnskóla og yfir í framhaldsskólana. Með einu leyfisbréfi sem Lilja Alfreðsdóttir keyrði í gegn. Það hafði örugglega ákveðna kosti fyrir kerfið í heild sinni en það var mikið áfall og rothögg fyrir leikskólakerfið því við misstum, á landsvísu, nokkur hundruð leikskólakennara yfir í grunnskólann. Einhverjir hafa komið til baka, en þetta er samt tap upp á um 150 leikskólakennara, bara út af þessari aðgerð. Og það munar um minna, því okkur sárvantar fleiri kennaramenntaða inn í leikskólana,“ sagði Skúli meðal annars, í samtali við Þórhall Val Benónýsson.
Þar fór Skúli einnig yfir það að Reykjavíkurleiðin í leikskólamálum mun ekki hækka gjöld á lægstu tekjuhópana, en þó búa til jákvæða hvata til að ýta undir að fleiri heimili sjái hag sinn í því að stytta vistunartíma barna sinna eitthvað, til að mæta þeim veruleika að vinnutími starfsfólks er einungis 36 tímar á viku en vistunartími meginþorra barna er yfir 40 tímar á viku. Skúli sagði að búið væri að fínstilla þessar aðgerðir til þess að þau sem ekki hafa sveigjanlegan vinnutíma þyrftu ekki að bera auka byrðar út af því, í formi hærri gjalda – og lágtekjuhópar alls ekki.
Í fyrri hluta hlaðvarpsins fór starfsfólk þingflokksins meðal annars yfir helstu tíðindin af flokksþingi Framsóknar og velti því meðal annars upp hvort það að verða formaður Framsóknarflokksins í dag væri svipað og að erfa vídjóleigu árið 2010.