Borgarstjórn Reykjavíkur, undir forystu jafnaðarfólks, hefur samþykkt að innleiða svokallaða Reykjavíkurleið í leikskólamálum. Kratinn tók saman 11 staðreyndir um það helsta sem í henni felst.
1 Reykjavík ætlar að bjóða upp á 36 klukkustunda gjaldfrjálsa vistun á viku. Ef dvalartími barna er innan þeirra marka greiða foreldrar eingöngu fyrir fæði barnsins. Þetta getur verið verulegur ávinningur fyrir stóran hóp foreldra.
2 Fyrir 38 klukkustunda vistun verður leikskólagjaldið 7000 krónur á mánuði auk fæðisgjalds. Þessi útfærsla tekur sérstaklega tillit til athugasemda foreldra í samráðsferlinu og er umtalsvert lægra gjald en í fyrri útfærslunni.
3 Afsláttarflokkar verða tekjutengdir. Það leiðir af sér að kerfið verður næmara fyrir raunaðstæðum foreldra og styður betur við einstæða foreldra og tekjulága hópa. Allir foreldrar í tekjulægsta hópnum munu greiða minna fyrir vistun en þeir gera í dag óháð vistunartíma. Til viðbótar lækka leikskólagjöld hjá flestum tekjuhópum sem nýta 40 klst vistun eða minna.
4 Samkvæmt jafnréttismati sem framkvæmt var á tillögunum liggur fyrir að hækkun gjaldskrár snerti fyrst og fremst lengstu vistunartímana og tekjuhæstu foreldrana. Breytingarnar koma ekki til með að hafa verulega neikvæð kynjuð áhrif en lagt er upp með að fylgjast grannt með áhrifum á heimilin.
5 Hámarksdvalartími verður áfram 42,5 klukkustundir á viku. Þeir foreldrar sem þurfa að fullnýta vistun munu áfram hafa möguleika á því.
6 Með því að ná að stytta vistunartíma sumra barna með fyrirsjáanlegum hætti hafa önnur sveitarfélög náð að bæta starfsumhverfi leikskólakennara og laðað að sér starfsfólk frá Reykjavík, sem hefur leitt til áskorana við mönnun leikskóla í borginni. Þessum tillögum er ætlað að snúa þeirri þróun við. Með því að draga úr fáliðun og auka fyrirsjáanleika við mönnun og rekstur leikskóla er hægt að efna faglegt starf leikskóla og gera allt kerfið betra.
7 Gögn benda til þess að foreldrar greiði í dag fyrir 10% lengri tíma en raunveruleg þörf er fyrir. Til þess að kerfið virki þarf að leitast eftir samstarfi við foreldra um að skrá einungis þann dvalartíma sem þörf er á. Þannig eykst fyrirsjáanleiki og hægt er að stýra álagi á starfsfólk betur.
8 Tillögurnar gera ráð fyrir að systkinasameining verði viðhöfð við innritun á leikskóla strax í mars. Sameining systkina verður meðal annars háð því að skóli eldra systkinis verði í fyrsta vali og að það verði í leikskóla að lágmarki sex mánuði eftir innritun. Dagbjört Hákonardóttir, þingmaður Reykvíkinga, er með frumvarp til meðferðar á Alþingi sem meðal annars skýrir lagaheimild sveitarfélaga til að notast við systkinaforgang.
9 Ráðist verður í fjölbreyttar aðgerðir til að efla íslenskukunnáttu starfsfólks af erlendum uppruna og þannig styrkja málumhverfi barna í leikskólum.
10 Ráðið verður í nýjar stöður umsjónarfólks leikskólahúsnæðis sem sjá mun um minni háttar viðhald og daglegan rekstur leikskólahúsnæðis á vegum borgarinnar. Með því verður álag tengt umsjón húsnæðis fært frá starfsfólki inni á leikskólunum.
11 Foreldrar verða rukkaðir fyrir vistun á skráningardögum sem skrá þarf tvisvar á ári. Ráðist verður í aðgerðir til að sameina skipulag og skóladagatöl milli skólastiga og létta byrðar foreldra með börn á báðum stigum vegna lokunardaga.