Eydís Ásbjörnsdóttir, þingmaður Samfylkingarinnar, ræddi efnahagsmálin í þinginu í vikunni. Þar rýndi hún meðal annars í nýja þjóðhagsspá sem var birt nýverið.
Eydís benti á að spáin sýndi að eftir samdrátt í hagkerfinu í fyrra, áður en skipt var um stjórnvöld, sé nú spáð hagvexti á þessu ári og þeim næstu. „Þetta gerist þrátt fyrir ýmis áföll sem dunið hafa á efnahagslífinu síðustu mánuði og undirstrikar styrk íslensks hagkerfis og fyrirhyggju ríkisstjórnarinnar. Áætlaður halli árið 2026 er í samræmi við fjármálaáætlun og útgjöld innan marka stöðugleikareglu. Ríkisstjórnin hefur sýnt í verki að hún bregst hratt við þegar þörf er á.“
Það hafi til að mynda gerst þegar Jóhann Páll Jóhannsson, umhverfis-, orku- og loftslagsráðherra, tilkynnti að Landsnet myndi hraða uppbyggingu nýs tengivirkis á Bakka til að auðvelda tvítengingu Húsavíkur í gegnum svæðið. Það gerði sami ráðherra svo aftur með undirritun yfirlýsingar um stóraukin umsvif loftslagsvænnar atvinnustarfsemi á Grundartanga í síðustu viku.
Eydís, sem flutti ræðu sína daginn áður en Seðlabankinn ákvað að lækka stýrivexti, tók líka saman að það er bjart fram undan í íslensku hagkerfi. „Við erum að fara inn í stærsta framkvæmdatímabil Íslandssögunnar. Landsvirkjun og Orkuveitan eru að ráðast í risavaxnar fjárfestingar sem munu vinna á móti hagsveiflunni. Langstærsta fjárfestingarverkefni einkaaðila sem hefur verið ráðist í á Íslandi, uppbygging á umfangsmiklu landeldi, stefnir að því að skapa allt að 220 milljarða króna í árlegar útflutningstekjur snemma á næsta áratug.“
Þá hafi ríki og sveitarfélög boðað miklar innviðafjárfestingar. Nýr risastór húsnæðispakki hafi verið kynntur og annar sé á leiðinni. Að auki sé loksins unnið að langtímaatvinnustefnu sem miðar að aukinni verðmætasköpun, útflutningi og fjölgun vel launaðra starfa um allt land.
„Stóra myndin er skýr. Hér eru stjórnvöld sem hafa plan og það plan virkar.“