Fjárhagsáætlun Reykjavíkurborgar fyrir næstu fimm ár var birt í vikunni. Samkvæmt henni á að reka þann hluta borgarinnar sem er rekinn fyrir skattfé, svokallaðan A-hluta, í 382 milljón króna hagnaði í ár. Sá árangur kemur í kjölfar þess að höfuðborgin skilaði rekstrarniðurstöðu sem var langt umfram áætlanir í fyrra þegar hagnaðurinn var 4,7 milljarðar króna.
Áætlunin gerir auk þess ráð fyrir miklum afgangi í rekstri Reykjavíkur á næstu árum. Hann á að verða 4,8 milljarðar króna strax á næsta ári og vaxa í skrefum upp í 10,6 milljarða króna árið 2030.Niðurstaða samstæðu Reykjavíkur, þar sem fyrirtæki í eigu borgarinnar eru talin með, er enn hagstæðari. Hjá henni verður hagnaðurinn tæplega 15 milljarðar króna í ár, sem er fjórum milljörðum krónum meiri hagnaður en í fyrra. Á næsta ári er svo gert ráð fyrir að rekstrarniðurstaðan verði jákvæð um 18,7 milljarða króna og fari svo enn hækkandi árin eftir.
Þessi áætlun er, líkt og árangur síðustu tæplega tveggja ára, mikil vonbrigði fyrir þá sem hafa klifað endalaust á þeirri röngu staðhæfingu að fjármál Reykjavíkur séu í ólestri og höfuðborgin rambi í raun á barmi gjaldþrots. Raunstaðan er hins vegar mikið fagnaðarefni fyrir alla hina sem byggja mat sitt á raunveruleika frekar en áróðri.
Staðan á þó ekkert að koma á óvart. Allar lykiltölur um fjármálalegt heilbrigði sýna stöðu Reykjavíkur vera betur rekna en önnur sveitarfélög á höfuðborgarsvæðinu, sem flestum er stýrt af Sjálfstæðisflokknum, með lægra skuldahlutfall, betra veltufjárhlutfall, meira veltufé frá rekstri og lægri skuldir á hvern íbúa.
Það skiptir ekki máli hversu oft lygin um fjármál Reykjavíkur er endurtekin, tölurnar sýna svart á hvítu að hún er ekki sönn.