Önnur umræða um leiðréttingu veiðigjalda stendur nú yfir á Alþingi. Hún hefur einkennst af því að stjórnarandstaðan hefur haldið á lofti þeim rangindum Samtaka fyrirtækja í sjávarútvegi (SFS) að veiðigjöld muni rúmlega tvöfaldast á milli þess að opinberum starfsmönnum er með ómaklegum hætti brigslað um óheilindi í pólitískum tilgangi.
Afar vönduð þingleg meðferð hefur farið fram í málinu sem felur meðal annars í sér að atvinnuveganefnd kallaði til yfir 50 gesti og fékk á sjöunda tug umsagna.
Hlustað var á málefnalegar athugasemdir sem leiddu til þess að nokkrar breytingar voru gerðar á frumvarpinu, meðal annars til að hlífa litlum og meðalstórum sjávarútvegsfyrirtækjum um allt land enn frekar en áður stóð til að gera. Það er gert með þrepaskiptu frítekjumarki en auk þess var ákveðið að miða við lægra viðmiðunarverð við ákvörðun álagningar veiðigjalds vegna makrílveiða.
Nú er staðan sú að ef búið hefði verið að leiðrétta veiðigjöld í fyrra þá hefðu þau verið 17,7 milljarðar króna í stað 10,3 milljarða króna. Það er aðeins minna en þau hefðu verið samkvæmt upprunalega frumvarpinu. Fyrir liggur að ríkisstjórnin ætlar að bæta sjö milljörðum króna við viðhald og þjónustu vega á næsta ári sem er nánast sama upphæð og veiðigjöldin munu hækka um.
Fyrir liggur að mikill meirihluti þjóðarinnar styður leiðréttingu veiðigjalda og kannanir sýna að því meira sem fólk veit um málið því meiri verður stuðningurinn. Enda um sanngirnis- og réttlætismál að ræða.