Það er vor í íslenskum efnahagsmálum. Vextir og verðbólga eru á niðurleið, atvinnuleysi mælist lítið, skuldahlutfall ríkissjóðs fer hratt lækkandi, það var hagvöxtur á fyrstu mánuðum ársins eftir samdrátt á síðasta ári og í vikunni birti Hagstofan tölur um að afkoma hins opinbera hafi verið jákvæð um 4,6 milljarða króna á fyrsta ársfjórðungi. Þar munaði mestu um að ríkissjóður aflaði 3,4 milljörðum króna meira en hann eyddi. Hann er ekki lengur rekinn á yfirdrætti heldur af ábyrgð.
Mælt var fyrir þriðju fjáraukalögum ríkisstjórnarinnar á þriðjudag. Ólíkt fyrri tveimur, sem snerust annars vegar um breytingar á stjórnarráðinu vegna fækkunar ráðuneyta og hins vegar um ÍL-sjóð, þá eru þessi með skýr pólitísk skilaboð um í hvers konar verkefni ríkisstjórn Kristrúnar Frostadóttur ætlar að forgangsraða fjármunum.
Í frumvarpinu segir meðal annars skýrt að:
- Það eigi að setja þrjá milljarða króna í vegaumbætur strax á þessu ári
- Tryggja á fjármagn svo hægt sé að fjölga lögreglumönnum um 50 stöðugildi
- Veita eigi fé í að halda meðferðarúrræðum vegna fíknar opnum í sumar
- Auka framlög til varnarmála svo hægt sé að styðja við Úkraínu vegna stríðsins þar
Í anda ábyrgrar efnahagsstjórnar verður þorri upphæðarinnar sem fer í þessi verkefni sóttur í mótvægisaðgerðir. Hluti hennar fellur til vegna þess að útgreiðslur úr Orkusjóði hafa verið minni en reiknað var með og útgjöld vegna atvinnuleysisbóta sömuleiðis. Hluti kemur úr því að peningar sem búið er að eyrnarmerkja ákveðnum verkefnum geta ekki nýst á þessu ári þar sem þau voru ekki komin á það stig að þurfa peninganna.
Stjórnarandstaðan hoppaði á þessa hliðrun fjármuna og Framsóknarfólk reyndi að mála upp þá mynd að það væri verið að slá einhverjum verkefnanna á frest. Mest púður fór í að reyna að segja að stækkun verkmenntaskóla víða um landið hefði verið „slaufað“. „Verknámsskólarnir hafa verið slegnir af,“ sagði þingmaður flokksins í pontu Alþingis.
Ekkert í framsetningu þingmannsins er í samræmi við raunveruleikann, líkt og kom skýrt fram í tilkynningu frá ríkisstjórninni í vikunni. Þar sagði einfaldlega: „Byggt við fimm verknámsskóla“ og að stefnt væri að því að framkvæmdir myndu hefjast í vetur. Áðurnefndur þingmaður Framsóknarflokks fór í kjölfarið aftur í pontu Alþingis, beindi orðum sínum til ráðherra málaflokksins og sagði einfaldlega: „Takk fyrir“.