Verðbólga hækkaði lítillega milli mánaða og mælist nú 4,2 prósent. Það var ekki óvænt og ástæðan fyrir hækkuninni er einföld: Það voru páskar í apríl. Sama gerðist í fyrra þegar páskahátíðin var í mars. Þá jókst verðbólgan milli mánaða en lækkaði svo strax aftur mánuðinn eftir.
Það sem gerist á páskum er að neysla eykst og verð á mat og drykkjarvöru hækkar, meðal annars vegna þess að þá er boðið upp á dýra sérvöru, til dæmis páskaegg, sem selst í bílförmum. Páskaeggin voru raunar allt að fjórðungi dýrari í ár en þau voru í fyrra. Auk þess þá eru páskarnir, með öllum sínum frídögum, vinsælir ferðadagar og margir Íslendingar fara í D-vítamín hleðslu til útlanda. Við það hækkar verðið á flugfargjöldum, enda voru þau 20 prósent dýrari í apríl en í mars.
Greiningaraðilar eru sammála um að þetta sé hraðahindrun frekar en vegatálmi í þeirri samfélagslegu vegferð í átt að verðbólgumarkmiði sem nú stendur yfir og að það sé ekki óvanalegt að verðbólgan geti hækkað milli stakra mánaða í lækkunarfasa. Það gerðist síðast í fyrrasumar.
Enn búast flestir greiningaraðilar við að það verði stýrivaxtalækkun á næsta vaxtaákvörðunarfundi peningastefnunefndar síðar í maí og þeir búast líka flestir við að verðbólgan fari aftur undir fjögur prósent, sem eru efri vikmörk verðbólgumarkmiðs Seðlabanka Íslands, strax í næsta mánuði.