Tólf mánaða verðbólga mælist nú 5,1 prósent og hjaðnaði lítillega milli mánaða. Þetta er annar mánuðurinn í röð sem það gerist. Þótt verðbólgumarkmiðið sem Seðlabanki Íslands vinnur í átt að sé 2,5 prósent þá hefur það markmið ekki náðst í meira en sex ár. Raunar er há verðbólga samofin Íslandssögunni. Þannig hefur hún verið yfir fimm prósent að meðaltali síðastliðinn 35 ár.
Mánaðarbreytingin milli apríl og maí var einungis 0,07 prósent, sem er langminnsta aukning verðbólgu milli mánaða síðan í nóvember í fyrra. Stór ástæða fyrir því að verðbólgan hjaðnaði er sú aðgerð ríkisstjórnarinnar að lækka virðisaukaskatt á dælunni tímabundið. Þetta var gert til að hlífa venjulegu vinnandi fólki við enn frekari kostnaði vegna áhrifa stríðsrekstursins í Íran á eldsneytisverð. Ljóst er að aðgerð ríkisstjórnarinnar heppnaðist fullkomlega. Hún skilaði því að verðbólga er 0,32 prósentustigum lægri en ella. Það munar um minna, sérstaklega fyrir þá sem eru með verðtryggð lán sem hækka í takti við verðbólgu.
Hluti af þeim pakka sem ríkisstjórnin innleiddi var tímabundið lagaákvæði sem skyldar söluaðila til að skila verðlækkuninni að fullu til neytenda og kemur í veg fyrir að eldsneytissalar geti stungið ávinningnum í vasann. Samkeppniseftirlitinu var auk þess falið að vakta álagninguna og að auki var verðlagseftirlit ASÍ einnig styrkt um 15 milljónir króna til að hafa sérstakt eftirlit í sumar með verðlagningu á öllum helstu tegundum dagvöru og þjónustu.
Stjórnarandstaðan bölsóttaðist út í þessar aðgerðir og kallaði þær sovéskar. Nú hefur sýnt sig að þær skiluðu því að eldsneytissalar hafa meira og minna skilað ávinningnum til heimila, sem er ekki í takti við það sem vanalega gerist þegar heimsmarkaðsverð á olíu lækkar.
Það sem drífur verðbólgu nú er annars vegar húsnæðisliðurinn og hins vegar flugfargjöld, sem eru vitanlega viðkvæm fyrir hækkun á olíuverði.