Þau gleðitíðindi bárust í vikunni að verðbólga hjaðnaði milli mánaða. Það gerðist þrátt fyrir þau gríðarlegu innfluttu áhrif á eldsneytisverð sem hafa orðið vegna stríðsins í Íran, en bensínverð hækkaði um 12,1 prósent í apríl, dísel um 19,7 prósent og flugfargjöld sem stýrast meðal annars af verði á þotueldsneyti um 6,1 prósent. Sömuleiðis voru birtar nýjar tölur frá Hagstofu Íslands í vikunni sem sýna að atvinnuleysi er að dragast saman.
Á miðvikudag var svo afgreitt frumvarp sem lækkar virðisaukaskatt á dælunni tímabundið. Aðgerðin er hugsuð annars vegar til að hemja verðbólgu enn frekar, með gríðarlegum ávinningi fyrir heimili og fyrirtæki landsins, og hins vegar til að skila hlífa venjulegu vinnandi fólki við enn frekari kostnaði vegna stríðsátakanna.
Óttinn við brúnkueftirlitið er óþarfur
Stjórnarandstaðan var með allt á hornum sér að venju vegna þessa frumvarps, vegna þess að í því er tímabundið lagaákvæði sem skyldar söluaðila til að skila verðlækkun að fullu til neytenda, og kemur í veg fyrir að eldsneytissalar geti stungið ávinningnum í vasann. Samkeppniseftirlitinu er falið að vakta álagninguna og að auki verður verðlagseftirlit ASÍ einnig styrkt um 15 milljónir króna til að hafa sérstakt eftirlit í sumar með verðlagningu á öllum helstu tegundum dagvöru og þjónustu.
Það að tryggja að aðgerðin skili sér í vasa neytenda og í minni verðbólgu verða hægrisins einhvers konar tilraun til að gera Ísland að Sovétríkjum síðustu aldar. Í hefðbundinni varðstöðu sinni fyrir sérhagsmuni í fákeppnisumhverfi, sem hann vill að fái að okra að vild í friði frá öllu eftirliti, fór varaformaður Sjálfstæðisflokksins lafhræddur í pontu og lýsti ótta sínum gagnvart því að næstu skref í kommúnísku verðlagseftirliti yrðu einhvers konar sólarvarnareftirlitsmenn. Hann getur sofið rólegur. Engin áform eru uppi um að vakta sérstaklega verðþróun á brúnkuvörnum hans í sumar.
Húsnæðispakki tvö
Stóra útspilið í vikunni var svo annar húsnæðispakki stjórnvalda. Samkvæmt honum verða byggðar allt að 1.400 nýjar íbúðir á lóðum ríkisins á næstu árum samhliða því að húsnæði í eigu þess verður breytt í íbúðir.
Áhersla verður á að vinna verkefnið hratt og að byggja minni íbúðir sem mest eftirspurn er eftir. Á bilinu 20 til 30 prósent þeirra verða almennar íbúðir, íbúðir sem uppfylla skilyrði hlutdeildarlána, aðrar leiguíbúðir (til dæmis stúdentaíbúðir, leiguíbúðir Félagsbústaða og íbúðir fyrir eldra fólk) og búseturéttaríbúðir.
Annað í pakkanum fellur í sér að málefni leigjenda verða tekin föstum tökum og húsnæðisstuðningur við þá bættur. Komið verður á nýjum viðbótarframlögum í almenna íbúðakerfinu vegna atvinnuhúsnæðis sem verður umbreytt í íbúðir. Framlögin munu nema allt að 5% af stofnkostnaði almennra íbúða (leiguíbúðir sem eru fyrir tekju- og eignalægra fólk) og koma til viðbótar við hefðbundin stofnframlög ríkis og sveitarfélaga. Þá hefur starfshópi um nýtt húsnæðislánakerfi verið falið að skoða hvort og þá hvernig taka megi upp nýtt húsnæðislánakerfi, með hliðsjón af erlendum fyrirmyndum, til að tryggja meira gagnsæi, sveigjanleika og fyrirsjáanleika fyrir neytendur.
Þetta kemur í kjölfar þess risastóra húsnæðispakka sem kynntur var í haust, og hefur þegar haft feikileg áhrif til góðs, enda var hann stútfullur af alls kyns aðgerðum sem eru réttlátar, hápólitískar og vel ígrundaðar.