Það hefur vart farið fram hjá nokkrum manni að Samfylkingin kynnti nýtt útspil fyrir utan Smáratorg í Kópavogi þar síðustu helgi, enda hafa pólítískir andstæðingar okkar gert hvað þeir geta til að vekja athygli á því, jafnt í fjölmiðlum sem ræðustóli Alþingis.
Útspilið, sett fram undir yfirskriftinni Tökum ábyrgð hvert á öðru, er afrakstur samtals við fólkið í landinu um hvernig létta megi fólki lífið og hvernig Samfylkingin geti komið að liði í þeim efnum.
Málefnastarfið fór af stað skömmu eftir flokksstjórnarfundinn á Hellu í haust, undir stjórn Jónasar Más Torfasonar, oddvita okkar í Kópavogi. Víðu neti var kastað út en að lokum var áherslan þrengd niður í nokkur kjarnamál sem jafnaðarfólk um allt land getur svo sannarlega staðið á bak við með stolti.
Í útspilinu eru tillögur að aðgerðum sem Samfylkingin vill standa að, sem allar snerta með einum eða öðrum hætti stjórnsýslustigin tvö og verkefni sem ríkið og sveitarfélög koma að í sameiningu – eða ættu að koma sér saman um í auknum mæli.
Í málefnastarfinu og á þeim mörgu opnu fundum sem Samfylkingin hefur haldið í vetur hefur nefnilega komið í ljós að venjulegu fólki er alveg sama hvort það eru sveitarfélögin eða ríkið sem er að veita þeim þjónustu. Fólk vill bara að þjónustan sé góð og gangi upp.
Því leggur Samfylkingin nú fram þrjú samvinnuverkefni ríkis og sveitarfélaga sem verða sett í forgang á næsta kjörtímabili í sveitarstjórnum landsins. Í stuttu máli eru þetta tillögur til að lækka kostnað barnafólks og hlúa að fólkinu sem byggði landið, auk þess sem stuðlað verði að einföldun regluverks í sveitarfélögum, rétt eins og gert hefur verið við stjórn landsmálanna.
Barnaskatturinn í Kópavogi allt að 450 þúsund
Tillögurnar fela meðal annars í sér að kostnaður barnafólks verði lækkaður, með því að setja þak á leikskólagjöld, þannig að foreldrar þurfi hvergi að borga meira en 50 þúsund fyrir átta tíma dagvistun tveggja barna – en tekjulægri greiði minna.
Sláandi munur er á því hvernig leikskólagjöld hafa þróast í þeim sveitarfélögum þar sem þau hafa hækkað hvað mest undir stjórn Sjálfstæðisflokksins á umliðnum árum. Í Kópavogi, sem gengið hefur lengst í hækkun gjalda á þau sem ekki hafa tök á því að stytta leikskóladagana verulega, kostar á ársgrundvelli 450 þúsund krónum meira að hafa tvö börn á leikskóla í 40 tíma á viku en í Reykjavík.
Einnig leggur flokkurinn til að réttur til leikskólavistar verði lögfestur í skrefum á næstu árum. Þetta er nokkuð sem hefur verið lengi í stefnu flokksins og ætti ekki að koma á óvart að sé á dagskrá hjá jafnaðarfólki. Það þarf að brúa bilið, með nýrri löggjöf og sameiginlegri fjármögnun ríkis og sveitarfélaga.
Einnig horfum við til þess að bjóða börnum og ungmennum frítt í Strætó og að haldið verði áfram að efla frístundastyrki til að ýta undir þátttöku barna í íþróttum og öðrum tómstundum.
Samfella í þjónustu við eldra fólk
Til að hlúa að fólkinu sem byggði landið boðar Samfylkingin svo áframhaldandi þjóðarátak í umönnun eldra fólks og uppbyggingu yfir 1.500 hjúkrunarrýma (samkvæmt framkvæmdaáætlun til 2030) – þannig að árið 2027 verði búið að helminga biðlistann eftir hjúkrunarrýmum og að árið 2030 verði biðlistinn kominn niður í 100 manns en að sá hópur fái biðrými og enginn bíði lengur en 90 daga.
Einnig hyggst Samfylkingin stórefla þjónustu við eldra fólk í heimahúsum með því að bjóða samfellda þjónustu við eldra fólk sem felst meðal annars í samþættingu heimaþjónustu, heimahjúkrunar og öldrunarráðgjafar – sem fylgir þörfum hvers og eins (þar með talið fyrir heimilishjálp, félagsstarf, heilsueflingu, dagdvalir, iðju- og sjúkraþjálfun o.s.frv.).
Auðveldum rekstur og uppbyggingu
Tillögur Samfylkingar til að auðvelda rekstur og uppbyggingu snúa meðal annars að því að einfalda leyfisveitingar og regluverk — eins og Samfylkingin hefur gert markvisst á fyrsta ári í ríkisstjórn. Leyfisferli verði einfölduð og sameinuð, dregið verði úr kvöðum við að afla umsagna og skýr tímamörk sett á afgreiðslu leyfisveitinga.
Samfylkingin leggur einnig til að komið verði upp einum viðkomustað fyrir fyrirtæki hjá hverju sveitarfélagi, þar sem fyrirtæki hafi fastan tengipunkt til halds og trausts. Þá verði haldið áfram að létta á kerfinu með fækkun ríkisstofnana um 15% á kjörtímabilinu, til að auka hagræði og bæta þjónustu við fólk og fyrirtæki.