Fjármálaáætlun 2027-2031 sýnir skýra áherslu stjórnvalda á að forgangsraða í þágu heilbrigðis- og velferðarmála. Ekki síst er þetta bersýnilegt í þeirri miklu aukningu framlaga til heilbrigðismála og uppbyggingar hjúkrunarrýma sem þar birtist, en alls eru árleg framlög til þessara mála að aukast um 68 milljarða króna, sé horft á stöðuna eins og hún er núna annars vegar og til lokaárs tímabils fjármálaáætlunar hins vegar.
Mikið af þessari aukningu kemur fram strax í upphafi áætlunarinnar, en framlög til heilbrigðismála árið 2027 verður þegar orðin 32 milljörðum meiri en þau voru á árinu 2025.
En hvernig skiptist þetta? Kratinn rýndi í fjármálaáætlunina og helstu málefnasviðin sem heyra að öllu leyti eða að hluta undir okkar skelegga heilbrigðisráðherra, Ölmu D. Möller.
Í fyrsta lagi er það sjúkrahúsþjónustan. Þar eru árleg framlög að vaxa um 22,2 milljarða á ári á tímabili fjármálaáætlunar. Af þeirri upphæð eru um 10,8 milljarðar vegna byggingar nýs Landspítala við Hringbraut og legudeildar við Sjúkrahúsið á Akureyri. Svo er rekstur svokallaðrar matsdeildar á bráðamóttöku Landspítala tryggður, auk þess sem gert er ráð fyrir styrkingu reksturs heilbrigðisstofnana.
Í annan stað er það svo málefnasvið heilbrigðisþjónustu utan sjúkrahúsa, mikilvægur þáttur í heilbrigðiskerfinu okkar allra. Þangað er verið að veita 11 milljörðum aukalega á tímabili fjármálaáætlunar, meðal annars auknum framlögum til Sjúkratrygginga Íslands til að mæta vaxandi þjónustuþörf og vinnu við að stytta biðlista.
Í þriðja lagi er það hjúkrunar- og endurhæfingarþjónusta. Þar er verið að spýta verulega í, en fjárveitingar málefnasviðsins, sem er einnig á ábyrgð félags- og húsnæðismálaráðherra, hækka um 28,9 milljarða króna á tímabili fjármálaáætlunar, aðallega vegna mikillar fjölgunar hjúkrunarrýma á tímabilinu, en eins og kynnt var á dögunum er stefnt að því að vinna verulega á biðlistum eftir hjúkrunarrýmum áður en áratugurinn er úti. Einnig verður tímabundið framlag til styrkingar meðferðarúrræða og annarra endurhæfingar sem sett var inn á fjárlög fyrir árið 2026 gert varanlegt.
Svo er það í fjórða lagi málefnasviðið lyf og lækningavörur. Þar er verið að bæta við um 6 milljörðum króna á tímabili fjármálaáætlunar, sem þýðir að verið er að styrkja kerfið um 1,4 milljarða umfram viðbúinn kerfislægan vöxt, til að styrkja og efla þjónustu vegna almennra og leyfisskyldra lyfja.
Allt miðar þetta að sömu framtíðarsýninni, að íslensk heilbrigðisþjónusta verði á heimsmælikvarða.