Lagabreytingar frá Loga Einarssyni ráðherra háskólamála, sem snúa að Menntasjóði námsmanna, voru samþykktar eftir 3. umræðu á fimmtudag. Breytingarnar auka svigrúm námsmanna til að geta notið námsstyrkja í formi niðurfellingar námslána, sem tengdir eru við námsframvindu.
Áður var það svo að nemendur sem kláruðu nám sitt innan tilsettra tímamarka fengu 30% námslána niðurfelld við námslok, en framvegis verður hægt að fá 20% námsstyrk eftir hverja vel lukkaða önn nemanda og svo 10% að auki ef námsframvindan í náminu í heild er samkvæmt áætlun.
Þetta veitir nemendum, sem kannski lenda í óvæntum atburðum sem kalla á námshlé, kost á að njóta námsstyrkjanna. Áfram verður þó hvati í kerfinu til að ljúka námi innan tilskilinna tímamarka.
Einnig voru samþykktar breytingar sem draga úr sviptingum á vaxtabyrði námslána og rýmka heimildir námsmanna til að greiða bara af einu láni í einu. Skýrsla sem unnin var um Menntasjóðinn leiddi í ljós að þörf væri á þessum breytingum og fleirum, til að sjóðurinn gæti betur staðið undir hlutverki sínu, að jafna tækifæri fólks til náms.
Tekið skal fram að frekari breytingar eru fyrirhugaðar á Menntasjóðnum. Unnið er að heildarendurskoðun á sjóðnum í ráðuneyti Loga, svo hann geti nýst fjölbreyttum hópi stúdenta og samfélaginu öllu betur.