Í aðdraganda kosninga í fyrra ákvað fjárlaganefnd Alþingis þverpólitískt að veita Ljósinu, mikilvægum félagasamtökum sem sinna endurhæfingu krabbameinsgreindra, einskiptisframlag umfram það sem síðasta ríkisstjórn Sjálfstæðisflokks, Framsóknar og Vinstri grænna ætlaði samkvæmt fjárlagafrumvarpi og fjármálaáætlun til ársins 2028 renna til þeirra. Framlagið var upp á 195 milljónir króna og kom til viðbótar þeim 279 milljónum króna sem samtökin áttu að fá til að sinna endurhæfingarþjónustu. Það er eðli einskiptisframlaga að þau falla sjálfkrafa niður við næstu fjárlagagerð. Þá þarf annaðhvort að gera samkomulag til lengri tíma við viðkomandi samtök eða að fjárlaganefnd ákveði að veita framlag aftur til eins árs.
Flokkarnir sem stóðu að síðustu ríkisstjórn ætluðu alltaf að framlagið færi niður í 279 milljónir króna á ný á næsta ári og að það myndi haldast þar líka árið 2027. Það hefði þýtt raunlækkun ef þeir hefðu haldið völdum, sem þeir gerðu blessunarlega ekki. Hægt er að sjá þetta í töflunni hér að neðan, sem sýnir ætluð framlög til ýmissa félagasamtaka í endurhæfingarþjónustu í fjárlagafrumvarpi síðasta árs.
Nú er fjárlagafrumvarp fyrir næsta ár til meðferðar í fjárlaganefnd og samkvæmt frumvarpinu á Ljósið að fá 283 milljónir króna. Samtökin hafa skilað inn umsögn til nefndarinnar þar sem beiðni samtakanna fyrir áframhaldandi auknu framlagi er rökstudd. Þetta er sama ferli og átti sér stað í fyrra, þegar Sjálfstæðisflokkur, Framsókn og Vinstri græn sátu í stjórn.
Jens Garðar Helgason, varaformaður Sjálfstæðisflokksins, er einn þeirra sem ákveðið hefur að gera sér pólitískan mat úr þessari stöðu með afar óskammfeilnum hætti. Jens, sem hefur helst unnið sér það til pólitískrar frægðar að telja það „heilaga skyldu“ sína að berjast gegn því að veiðigjöld á stórútgerð yrðu leiðrétt með milljarða króna ávinningi fyrir ríkissjóð og almenning allan, sveiflar nú gleraugunum sínum af miklum hneykslunarmóð vegna þess sem hann kallar niðurskurð til Ljóssins.
Í nafni þeirrar tvíhyggju sem einkennir alla pólitík Sjálfstæðisflokksins nú um stundir þá stillti hann málinu upp þannig að það væri frekar verið að nota fjármuni í alþjóðleg samtök hinsegin fólks ( framlag sem var veitt með í samræmi við stefnu Íslands um alþjóðlega þróunarsamvinnu 2024-2028 sem var lögð var fram af Bjarna Benediktssyni, þáverandi utanríkisráðherra, og samþykkt einróma á Alþingi) eða í starfslokasamning fyrrverandi vararíkissaksóknara (afleiðing af farvegi sem var ákvörðun núverandi formanns Sjálfstæðisflokksins og þáverandi dómsmálaráðherra) en í Ljósið. Allt hjá Sjálfstæðisflokki dagsins í dag snýst enda um að egna hópum saman.
Þetta gerði Heilagur Jens blygðunarlaust á sama tíma og fyrir liggur að sú innviðaskuld í heilbrigðiskerfinu sem verið er að reyna að vinna á í stjórnkerfinu, sem hleypur á mörgum milljörðum króna á ári, varð til á vakt hans flokks. Samhliða öskrar sami flokkur á torgum um að það þurfi að skera meira niður í velferðarkerfinu, helst um fjölmarga milljarða króna.
Svona pólitísk tækifærismennska væri fyndin ef hún væri ekki svona sorgleg. Sem betur fer er fullorðið fólk sem nálgast ríkisfjármálin og velferð þjóðar af ábyrgð við stjórnvölinn í landinu. Eitt þeirra er Alma Möller heilbrigðisráðherra sem greindi frá því í óundirbúnum fyrirspurnum á fimmtudag að búið sé að ná samningum milli Sjúkratrygginga og Ljóssins fyrir yfirstandandi ár sem greiði leiðina fyrir mögulegum langtímasamningi þar á milli. Alma sagði auk þess að það væri alls ekki loku fyrir það skotið að veitt yrði viðbótarfjármagn til Ljóssins við fjárlagavinnu þessa árs.
Það er nefnilega heilög skylda Samfylkingarinnar að vinna að bættu samfélagi, aukinni velferð og meiri lífsgæðum og öryggi fyrir alla. Um það snýst yfirstandandi tiltekt eftir efnahagslega óstjórn síðustu ríkisstjórnar. Á grunni hennar verður hægt að byggja upp til framtíðar.