Peningastefnunefnd Seðlabanka Íslands ákvað að halda stýrivöxtum óbreyttum í vikunni. Það vakti hins vegar athygli að í yfirlýsingu hennar kom skýrt fram að mál séu að þróast í rétta átt. Þar sagði að „greinilegur viðsnúningur hefur orðið í þróun efnahagsumsvifa undanfarið og spennan í þjóðarbúinu hefur hjaðnað í takt við þétt taumhald peningastefnunnar.“
Í viðtölum í kjölfar ákvörðunarinnar sagði Ásgeir Jónsson seðlabankastjóri að ríkisfjármálin væru að styðja ágætlega við framkvæmd peningamálastefnu. Aðspurður hvort við séum nær lækkun vaxta eða hækkun þeirra svaraði Ásgeir afgerandi: „Ég held að við séum nær vaxtalækkun.“
Þetta er allt annar tónn en hann sló þegar síðasta ríkisstjórn sat að völdum, þar sem Ásgeir benti ítrekað á að hún væri ekki að gera nóg til að ná niður verðbólgu. Með öðrum orðum þá er ábyrg stjórn efnahagsmála og árangursrík tiltekt ríkisstjórnar Kristrúnar Frostadóttur farin að skila þeim árangri sem stefnt var að.
Hér hefur enda mikið verið gert á skömmum tíma. Það hefur verið tekið hratt til í efnahagsmálum eftir óráðsíu síðustu ára sem skilaði um tíma tveggja stafa verðbólgu og stórauknum útgjöldum fyrir íslensk heimili.
Það má heldur ekki gleyma því að stýrivextir hafa lækkað um 1,5 prósent frá því að boðað var til kosninga í fyrrahaust sem skilar sér í að meðalfjölskylda borgar um það bil 50 þúsund krónum minna í vaxtakostnað en áður. Hér hefur aðhald verið aukið með nýrri ríkisstjórn, halli á fjárlögum næsta árs verður lítill og boðuð hafa verið hallalaus fjárlög 2027.
Forsætisráðherra hefur ítrekað sagt að ef það þurfi að gera meira hraðar til að ná þeim árangri þá munum við gera meira hraðar. Það er meðal annars verið að gera með húsnæðismála- og efnahagspakka sem verið er að leggja lokahönd á og verður kynntur áður en október er úti.
Með honum er ríkisstjórnin að bregðast við aðstæðum með aðgerðum sem eiga að hafa þau áhrif að íbúðahúsnæði sé skilgreint sem heimili, ekki fjárfestingavara, innleiddur verði markvissari húsnæðisstuðningur og hlutdeildarlánin verða látin virka betur.
Þannig ætlar ríkisstjórnin að mæta þeim hópum sem verða helst fyrir barðinu á hinu háa vaxtastigi: Ungu fólki, skuldsettu fólki og þeim sem eru fastir á leigumarkaði.