Síðasta laugardaginn í september stóð Verkalýðsmálaráð Samfylkingarinnar fyrir málstofu á Selfossi um nýtt örorku- og endurhæfingarlífeyriskerfi. Aðeins bar á því að orð Jóhanns Páls Jóhannssonar, umhverfis-, orku- og loftlagsráðherra, væru tekin úr samhengi eftir fundinn, en lesa mátti úr fyrirsögnum frétta að Jóhann Páll teldi eldri borgara lifa í vellystingum. Enginn hópur hefði það betra.
Þetta er að sjálfsögðu ekki það sem ráðherrann átti við og útskýrði hann það raunar sjálfur í færslu á samfélagsmiðlum. „Hið rétta er, sem ég vék raunar sérstaklega að á fundinum, að stór hópur eldra fólks býr við bág kjör og er með afar takmörkuð réttindi í lífeyrissjóðum,“ skrifaði Jóhann Páll.
„Á undanförnum árum hef ég gagnrýnt óréttlátar skerðingarreglur í almannatryggingakerfinu og bent á að með því að ríghalda frítekjumarki lífeyrissjóðstekna hjá eldra fólki í 25 þúsund krónum á mánuði er í raun verið að demba 67 prósenta jaðarskattbyrði á tekjulægri eldri borgara. Þetta varð til þess að heildarumfang skerðinga ellilífeyris nær tvöfaldaðist á tímabilinu 2017 til 2024. Ég hef líka gagnrýnt trekk í trekk groddalega kjaragliðnun milli lífeyris og launa, sem kemur harðast niður á þeim tekjulægri sem reiða sig á almannatryggingakerfið okkar.
Nú er ný ríkisstjórn undir forystu Kristrúnar Frostadóttur, með Ingu Sæland í félagsmálaráðuneytinu, að taka fast á nákvæmlega þessu: tvöfalda frítekjumark lífeyrissjóðstekna, stöðva kjaragliðnunina og taka sérstaklega utan um tekjulægstu hópana,“ skrifaði Jóhann Páll einnig, í færslu á Facebook.
Ríkisstjórn Kristrúnar Frostadóttur hefur hafið stórátak í þjónustu við eldra fólk, með fjölgun hjúkrunarrýma og auknum stuðningi við heimahjúkrun. Stefna stjórnvalda miðar þannig að því að bæta bæði kjör og aðbúnað eldri borgara, ásamt kjörum öryrkja.