Á morgun verður kosið í sveitarstjórnum út um allt land, og þar á meðal í höfuðborginni Reykjavík. Þar er mikið undir enda hægri öflin að gera margháttað áhlaup á þau lífsgæði sem gera Reykjavík að þeirri frábæru borg sem hún er. Það þarf að verja árangur síðustu ára og áratuga sem hefur gert Reykjavík að einni bestu borg í heimi og halda áfram að sækja til að gera hana enn betri.
Hér eru ellefu atriði sem kjósendur ættu að hafa í huga þegar þeir ganga inn í kjörklefann:
1. Hægrið ætlar að selja eignirnar ykkar: Það er yfirlýst stefna Sjálfstæðisflokksins í borginni, komist hann til valda, að hann ætli sér að selja fjölmargar eignir borgarbúa. Þar á meðal eru eignir úr samstæðu Orkuveitu Reykjavíkur. Það er í fullum takti við stefnu flokksins á landsvísu, þar sem boðað hefur verið að stór hlutur í Landsneti og Rarik verði seldur komist Sjálfstæðisflokkurinn aftur til valda. Auk þess lýsti formaður flokksins því yfir opinberlega fyrir örfáum árum að hún vildi selja 30-40% hlut í Landsvirkjun. Samfylkingin ætlar að verja þessar eignir. Það kemur ekki til greina að selja þær.
2. Aukinn einkarekstur eða varðstaða um velferð: Hægrið vill líka koma stærri hluta velferðarkerfisins, menntakerfis og samgöngukerfum í hendur hagnaðardrifinna einkaaðila og láta þá um að sinna slíkri þjónustu að viðbættri arðsemiskröfu. Sá háttur myndi óumflýjanlega auka kostnað borgarbúa sem þurfa að nýta þessar þjónustur. Samfylkingin ætlar að verja þessa þjónustu. Það kemur ekki til greina að einkavæða hana.
3. Það verður dýrara að leggja: Sjálfstæðisflokkurinn vill selja bílastæðahús sem í dag eru í eigu Reykjavíkur til hagnaðardrifinna fyrirtækja. Um er að ræða 1.1144 bílastæði í sjö bílastæðahúsum. Fyrir þá sem vinna eða búa í miðborginni og kaupa langtímastæði í bílastæðahúsum yrði viðbótarkostnaðurinn við það að Reykjavíkurhúsin færðu sig upp í markaðsverð einkarekinna bílastæðahúsa gríðarlegur. Í dag kosta Reykjavíkurhúsin um einn þriðja af því sem það kostar að leggja undir Hörpu ef lagt er í þrjá klukkutíma og um einn fjórða ef lagt er undir Hafnartorgi/Reykjarstræti. Samfylkingin mun ekki selja bílastæðahúsin. Það kemur ekki til greina að gera það dýrara fyrir borgarana að leggja í miðborginni svo einkaaðili geti grætt meira.
4. Samgöngubylting eða samgönguslys: Hægri flokkarnir vilja rífa upp samgöngusáttmála höfuðborgarsvæðisins og byrja upp á nýtt með hann. Það yrði algjör afleikur og myndi fela í sér margra ára tafir á framkvæmdum sem unnið hefur verið að árum saman og eru rétt handan við hornið. Fyrir liggur að mikilvægasti ás Borgarlínu, svokölluð fyrsta lota sem liggur frá Kópavogi og upp á Höfða, verður tekin í gagnið eftir 3-4 ár. Það mun bylta samgöngumálum í Reykjavík. Ef hægrið kemst af munu samgönguframfarir stórskaðast og mörg ár bætast við biðtímann eftir úrbótum. Á meðan mun umferðin, sem þyngist um 70 bíla á viku, bara þyngjast og hnútarnir í henni herðast. Samfylkingin mun standa með sáttmálanum, mestu samgönguúrbót sem höfuðborgarsvæðið hefur nokkru sinni ráðist í.
5. Við rekum samfélag, ekki fyrirtæki: Til að reyna að búa til þær aðstæður að nauðsynlegt sé að selja eignir og skera niður í velferðarþjónustu teiknar hægrið ítrekað upp þá mynd að Reykjavík sé illa rekin. Ekkert er fjarri sanni og allir hefðbundnir mælikvarðar sem mæla fjárhagslegt heilbrigði sýna það svart á hvítu. Nettóskuldir Reykjavíkur sem hlutfall af tekjum eru til að mynda þær næstlægstu á höfuðborgarsvæðinu, skuldir á hvern íbúa líka og sömu sögu er að segja af skuldahlutfalli.
6. Langbest rekna sveitarfélagið á höfuðborgarsvæðinu: Svo er Reykjavík eina sveitarfélagið á höfuðborgarsvæðinu sem getur borgað gjaldfallnar skuldir sínar á yfirstandandi ári án þess að taka yfirdrátt eða selja eignir. Þetta er staðan þrátt fyrir gríðarlega miklar fjárfestingar í skólum, íþróttafélögum, menningu, velferð, húsnæði eða öðrum lífsgæðum borgarbúa. Um síðustu áramót var handbært fé Reykjavíkur á hvern íbúa 98.595 krónur. Hver íbúi Kópavogs átti á sama tíma 1.605 krónur á reikningi sveitarfélagsins og ekkert sveitarfélag á höfuðborgarsvæðinu, sem flestum er stýrt af Sjálfstæðisflokki, gat státað sig af því að handbært fé á hvern íbúa væri yfir rúmlega sex þúsund krónur nema Reykjavík.
7. Reykjavík dregur alla vagnana: Þetta er staðan jafnvel þótt íbúar Reykjavíkur leggi miklu meira til hver og einn af skattfé sínu til að standa undir félagslegri þjónustu, uppbyggingu á almennu og félagslegu húsnæði, í menningu og fjárfestingu innviða. Það gerir Reykjavík án þess að leggja gjaldakláfa á íbúa sína og þrátt fyrir að fá einna minnsta framlag allra úr jöfnunarsjóði sveitarfélaga þegar því framlagi er skipt niður á íbúa.
8. Hægrið vill ráðast að störfunum ykkar: Ein uppáhaldssögn hægriflokka er sú að stjórnsýsla og skrifstofukostnaður, hið svokallaða „fitulag“ eða miðstjórnarbákn, hafi vaxið gríðarlega á síðustu árum á kostnað grunnþjónustu. Samkvæmt tölum úr opnu bókhaldi borgarinnar er þessi sögn með öllu ósönn. Árið 2014 var kostnaður við miðstjórnarbáknið 14,3 prósent af launum sem greidd voru í borginni. Í fyrra var hann 9,9 prósent af þeim. Því er ljóst að hlutfallslega hefur þessi kostnaður verið að dragast mikið saman og hefur aldrei verið minni. Harðduglegt fólk sem vinnur á skrifstofum borgarinnar ætti að hafa þetta í huga þegar það kýs á laugardag.
9. Húsnæði eru mannréttindi, ekki fjárfestingarvara: Samfylkingin ætlar að byggja um sex þúsund íbúðir á næsta kjörtímabili og er nýbúin að landa samkomulagi við ríkið um að byggja á ríkislóðum innan borgarmarka. Þar verður áherslan á að byggja minni íbúðir sem mest þörf er fyrir og tryggt verður að um 30 prósent verði almennar íbúðir, uppfylli skilyrði fyrir hlutdeildarlánum eða annars konar leiguíbúðum, aðallega fyrir tekjulága hópa. Komist Sjálfstæðisflokkurinn til valda í Reykjavík eftir komandi kosningar þá ætlar hann hins vegar að leggja niður almenna íbúðarkerfið og selja mörg þúsund félagslegar íbúðir sem veita lágtekjufólki og viðkvæmum hópum þak yfir höfuðið, án þess að nokkuð komi í staðinn. Með því vill hann búa til fjárfestingarvöru úr félagslegu öryggisneti.
10. Börnin í fyrsta sæti. Samfylkingin ætlar að lögfesta rétt barna til leikskólavistar, taka upp systkinaforgang, bæta vinnuaðstæður og fjölga leikskólaplássum um 1.500 á kjörtímabilinu til að bjóða yngri börnum inn á leikskóla. Hún er þegar búin að innleiða Reykjavíkurleiðina sem bætir starfsaðstæður á leikskólum, minnkar bil milli vinnutíma starfsfólks og vistunartíma barna og passar upp á að lægri tekjuhópar og þeir sem eru í viðkvæmri stöðu þurfi ekki að bera ósanngjarnar efnahagslegar byrðar.
11. Engan barnaskatt eins og í Kópavogi: Það er ólíkt hægrinu sem vill frekar halla sér að Kópavogsmódelinu, þar sem venjuleg fjölskylda með tvö börn borgar 450 þúsund krónur í barnaskatt á ári umfram það sem hún þyrfti að borga í Reykjavík, vill leyfa fyrirtækjum að setja á fót leikskóla þar sem börn starfsmanna njóta forgangs og auka eins og hægt er hlutdeild einkareksturs í leikskólamálum. Samfylkingin ætlar að standa vörð um borgarrekna leikskólakerfið sem hornstein samfélagsgerðarinnar.