Ýmsir fjölmiðlar úr hægri hólfum samfélagsins og pólitískir andstæðingar meirihlutans í Reykjavík, sem Samfylkingin leiðir, reyna oft að mála upp þá mynd að allt sé á hverfanda hveli í höfuðborginni. Því fer þó fjarri og á síðustu dögum og vikum hafa ýmsar staðreyndir komið fram sem grafa að öllu leyti undan slíkri framsetningu.
Flestar íbúðir í uppbyggingu
Þingmönnum í stjórnarandstöðu, minnihlutanum í borgarstjórn og fjölmiðlum sem deila pólitík með þeim er tíðrætt um að Reykjavíkurborg sé rót þess húsnæðisvanda sem ríki á Íslandi. Ef byggt er nægjanlega mikið í höfuðborginni þá myndi vandinn leysast.
Raunveruleikinn er hins vegar sá að í Reykjavík hefur átt sér stað mesta uppbyggingarskeið í sögu borgarinnar á síðustu árum. Í tölum sem Húsnæðis- og mannvirkjastofnun (HMS) birti í vikunni kom svo fram að Reykjavík er leiðandi í uppbyggingu íbúða á landinu, að umtalsvert fleiri íbúðir séu í byggingu í höfuðborginni einni saman en í öllum nágrannasveitarfélögum hennar og að 40 prósent allra nýrra framkvæmda sem fóru af stað milli talninga HMS hafi verið í Reykjavík.
Það er því stöðugur og jafn vöxtur á húsnæði í borginni. Dagur B. Eggertsson, fyrrverandi borgarstjóri og núverandi þingmaður, fjallaði um þessa stöðu í ræðu á Alþingi á þriðjudag. Þar sagði hann að jákvæða hliðin á þessari þróun væri sú að „þetta er blandað með óhagnaðardrifinni uppbyggingu sem skilar leiguverði sem er 35 prósent lægra en markaðsverðið. Með húsnæðisstefnu borgarinnar hefur því verið tryggt að allir tekjuhópar geti búið í borginni. Til viðbótar sýna þessar tölur að þessi blandaða uppbygging er minna næm fyrir hagsveiflunum sem hafa leikið húsnæðismarkaðinn svo grátt (Forseti hringir) vegna þess að óhagnaðardrifnu félögin hafa getað byggt í samvinnu við borgina þegar aðrir draga sig í hlé, eins og þau gera annars staðar.“
Heilbrigð fjármálastaða
Ein lygi sem hefur verið endurtekin í sífellu, í von um að endurtekningin ein geri hana að sannleika, er sú að fjármál Reykjavíkur séu í köldum kolum. Að borgin sé nánast á barmi gjaldþrots og það þurfi bláar hendur til að bjarga henni frá glötun.
Staðreyndir málsins sýna hins vegar allt aðra mynd. Allar lykiltölur um fjármálalegt heilbrigði sýna stöðu Reykjavíkur vera betur rekna en önnur sveitarfélög á höfuðborgarsvæðinu, sem flestum er stýrt af Sjálfstæðisflokknum, með lægra skuldahlutfall, betra veltufjárhlutfall, meira veltufé frá rekstri og lægri skuldir á hvern íbúa. Í fyrra hagnaðist borgin um fimm milljarða króna, sem var langt umfram áætlun.
Þessum árangri var náð án þess að hækka nokkra skatta í Reykjavík og þrátt fyrir að Reykjavík sinni félagslegri þjónustu langt umfram önnur sveitarfélög á landinu, með tilheyrandi kostnaði.
Samkvæmt nýlega birtu hálfsársuppgjöri er staðan áfram góð. Veltufé frá rekstri er á betri stað en fyrir ári og rekstur A-hluta borgarinnar, þess hluta sem er rekinn fyrir skattfé, er í fínu jafnvægi. Skuldir á íbúa eru áfram sem áður mun lægri en í öllum öðrum sveitarfélögum á höfuðborgarsvæðinu, að Kópavogi undanskildum.
Þetta er staðan á sama tíma og önnur stór sveitarfélög á svæðinu eru töluvert frá áætlunum sínum. Hafnarfjörður tapaði til að mynda 1,2 milljarði króna á fyrstu sex mánuðum ársins, Garðabær hagnaðist um tólf milljónir króna þegar áætlanir gerðu ráð fyrir 258 milljón króna hagnaði og hagnaður Kópavogs er fyrst og síðast tilkominn vegna þess að lóðagjöld upp á 1,3 milljarða króna voru tekjufærð.
Leikskólamál, almenningssamgöngur og heimilislausir
Önnur bábilja er að leikskólamál í Reykjavík séu í ólestri í samanburði við önnur sveitarfélög. Tölurnar sýna þó annað, þótt alltaf megi gera betur. Þannig fengu öll börn sem voru átján mánaða eða eldri 1. september síðastliðinn, og voru með umsókn í borgarrekna leikskóla, boð um vistun fyrir veturinn. Auk þess var hægt að verða við óskum hjá flestum sem sóttu um flutning milli leikskóla og biðlistar þeirra barna sem eru tólf mánaða og eldri sem bíða eftir plássi hefur minnkað um 40 prósent milli ára.
Þá stórjókst þjónusta Strætós um miðjan síðasta mánuð með aukinni tíðni hans. Hlutfall íbúa sem búa innan 400 metra frá stoppistöð með tíu mínútna tíðni á annatíma fór úr um 18 prósentum í rúmlega 50 prósent. Þetta er farsældarskref fyrir alla íbúa höfuðborgarsvæðisins, sem byggir á samgöngusáttmála þess, en mest verður þjónustuaukningin eðlilega þar sem Strætó fer flestar ferðir, í Reykjavík.
Reykjavík hefur líka verið eina sveitarfélagið á höfuðborgarsvæðinu sem hefur sinnt þjónustu við jaðarsettustu hópa samfélagsins, heimilislaust fólk. Þar hefur verið lögð áhersla á að koma fólki í varanlegt húsnæði í stað þess að það sé aðallega að nýta neyðarúrræði sem húsaskjól. Það hefur gengið vel eftir og eftirspurn eftir neyðarþjónustu hefur dregist umtalsvert saman milli ára.
Það er því áfram sem áður gott að búa í framsækinni, ábyrgri og vel rekinni Reykjavíkurborg undir forystu Samfylkingarinnar.